नीयत

ग़ज़ल

नीयत

केहु कहलस कि पूरा अरमान हो गइल

आधिरतिये बुझाइल बिहान हो गइल

जवन पोंसल रहल बा नन्हइयें से ऊ

कल्ले कल्ले सपनवाँ सेयान हो गइल

साँच के साथ धइले उमिर चलि रहल

झूठ बोलल ऊ मनई महान हो गइल

का पता कब्बों खाले ढकेलिये दिहें

पोढ़ अतना भरोसा, बेजान हो गइल

पी के असरा के पानी जियल जा रहल

खाके धोखा जिनिगिया जियान हो गइल

थूकि के चाटि के फेरु थूकल - चाटल

का कहल जाउ बेहया के खान हो गइल

टेढ़ नीयत लगे जइसे धनुहीं 'घायल'

बात हियरा के बिषिआइल बान हो गइल

कृष्णदेव घायल